كيف تبيع في ماركت النادي

البيع حتى في سوق نادي صحارى سفاري ممكن يتحسن أفضل بكتير لو عملت بنصيحة أو اتنين من النصايح المفيدة التالية
(احنا حنتكلم بالعربي العادي عشان بس نبقا واضحين لكل الأعمار):-

-احضر بدري عشان تختار مساحة على الترابيزة أو على الأرض (حسب حجزك) تكون باينة من كل الزوايا. مفيش حجز غير للحاضرين بوضع أشيائهم في مساحتهم المحددة قبل ما حد تاني يحجزها.

-التنضيف: المستعمل دايما فيه خدوش طبعا ، لكن حتى القديم له لمعة وبريق فحاول تغسله على قد ما تقدر.

-حاول تحط شكل عرض مغري من بعيد لحاجتك (بدون ما تعرضها للكسر) زي انك ترصها في شكل هندسي معين أو تحط الناحية اللي بتلمع في وش الناس.

-ابعت أو شير لينك ايفنت السوق لكل أصحابك عالفيسبوك وجروبات الواستاب اللي ان عليها وقول انك رايح تبيع حاجات فيها وتحب تشوفهم هناك. لو حد بعتلك بيسأل على ايه قولله طبعا بس هو كده كده غالبا حيروح يشوف باقي الحاجات وحيحاول يفاصل في السعر قبل ما الناس تشوفه فلو ما اشتراش بالسعر المطلوب خليه يقابلك هناك ةيمكن يقتنع أو انت تنزل السعر وتخلص معاه.

-افهم زبونك من مجتمع السفاري المصري وجيبله حاجات مغرية له: ناس راقية لهم تقل في هواياتهم وبيحبوا يصرفوا عليها ويجيبوا فيها حاجات بأفكار تسهل عليهم هواياتهم أو تحسن الاستمتاع بهواياتهم: كتب تعديلات 4×4 ، بوتاجاز صحرا ، تنك هوا للغوص ، نضارة شمس بولارايزد ماركة مشهورة ، عدة عربية كاملة ، الخ.. لكن كمان فيه حاجات ممكن تعجبهم في حياتهم الشخصية زي:- ميزان حمام ، سلاسل مفاتيح ، عربيات RC بتحكم ريموت ، سماعات رأس ، ساعة قيمة قديمة ، أسلاك usb فيها مزايا خاصة ، الخ. كل ده ممكن تلاقيله بيعه ان شاء الله بس حيبقا أقل توقعا من عدد المغامرة شوية. أما لو جبت كرافتات ولا مجلات "آخر ساعة" أو جرايد للبيع بالكيلو فمفيش حد جاي يشتري الحاجات دي.

-لاحظ ان بالرغم من ان كل بضاعتنا المعروضة حتبقا مغرية جدا وزبونها أكيد في مجتمع السفاري المصري ، لكن لكل هواية متخصصين فيمكن تحب تحط يافطة واضحة من بعيد عن الرياضة المثلى لاستعمال بضاعتك زي 4×4 أو For Hikers أو"لعشاق عالم الحيوان" أو حتى "لكل رياضات المغامرة والاستكشاف". من أفكار اليفط انك تستعمل الشنط الورق بتاعة المحلات وتلزق على أجنابها ورق أبيض عليه اعلانك بخط ماركر تخين أو كتابة برينتر ، وتحط فيها حاجة تقيلة شوية تحت وتحشيها ورق جرايد عشان تفضل واقفة ومنفوخة.

-فرد الحاجات على الترابيزة بيخلي منظرها واضح وأسهل في البيع جدا. فلو حاجتك كبيرة وكتيرة ، اطلب في فورم الحجز كذا مساحة جنب بعض عشان تضم حاجتك فيهم براحتك ويبقوا باينين. يعني مش مهم تعتني بشكل رصة الكتب بشكل جمالي لو ده حيغطي عناوين الكتب أو فرصة الناس انها تقلب في صفحات الكتاب قبل ما تشتريه.

-أثناء البيع حاول تستعمل حوامل للعرض عشان تحسن العرض. وحاول تعمل تغليف شيك لحاجات بس مش لدرجة ان محدش يقدر يفتحها يشوف اللي جواها.

-لو معاك حاجات الناس تحب تمسكها بايدها أو تشم ريحتها (بخور مثلا) قبل ما تشتريها متغلفهاش بكيس معتم أو مينفعش يتفتح الا بقطع الغلاف.

-في تسعيرك لبضاعتك خليك فاهم في سعر الجديدة منها من غير ما حد يفاجئك بيه. فيه حاجات تمنها ما بينزلش كتير لما تقدم. وحاجات بتنزل جامد. حاجات تقيلة في بيعها وحاجات بتتباع بسرعة عشان الناس فاهمة فيها. أهم حاجة خليك فاكرها وانت بتسعر الحاجة--حتى لو جديدة لنج وجايالك تخليص حق مثلا-- هيا انك مش متخصص بيع وحتصرف كتير من غير ما تعرف تلاقي زبونها فأحسن انك تحطها بسعر مغري عشان ترجعلك فلوسها بسرعة بدل ما توقف فلوسك فيها لمدة طويلة. ساعات كسر بسيط نازل عن سعر السوق يخليك تخلص فيها بسرعة خرافية من غير ما تتعب. عادة النصايح بتقولك متتنازلش عن ولا مليم في قيمة حاجتك بس ده ينفع مع التجار أما احنا فما بنبيعش الا في التقيلة. وبنرمي حاجات كتير كان ممكن نبيعها بكام مائة جنيه عشان معندناش وقت نقف على بيعها. دي قاعدة مهمة لكل الناس اللي عايزة تبيع في أي مكان على فكرة.

-لو فيه حاجة عندك سعرها الجديد (تليفون مثلا) هات اعلانه اللي فيه سعر الجديد وحطه جنب البضاعة والسعر اللي انت طالبه. ده حيخلي اثبات النقطة دي تخلص بسرعة. لو معرفتش ممكن تكتب سعره المتوسط وتكتب المواقع اللي بتجيب سعره في مصر جديد عشان المقارنة.

-حط السعر بورقة (ملزوقة) على كل حاجة للبيع مش لستة جنب الحاجات الكتير لأنهم ساعات مبيعرفوش الحاجة باسمها وحيتكسفوا يسألوا طبعا (كالعادة). خصوصا لو عامل سعر واحد لمجموعة كبيرة (باقة) وحواليهم حاجات تانية متلخبطين حواليهم.

-لو مش متأكد من سعر أو مواصفات ، ابعت على جروب نادي صحارى سفاري على الحاجة بتاعتك بسؤالك ( https://www.facebook.com/groups/SaharaSafaris.club ). ممكن طبعا تطلب يبعتولك عالانبوكس بعيد عن الأعين ، بس الكومنتات الكتير على حاجتك بتعمل دعاية في حد ذاتها. كل ما التعليقات كترت كل ما الناس حيغريها ييجوا ويلحقوا حاجتك قبل ما تتباع (كم الاهتمام بعدد الكومنتات حيفرق مع ناس يمكن أكتر من لو كام احد قللوا من قيمتها في وسط الكومنتات ودي حاجة طبيعية لناس بتحاول تشتري انها تقول كده).

-حتستغرب لو قلنالك انك بعد ماتوضب بضاعتك روح لف على الباقي وغالبا حتلاقي بتشتري منهم قبل ما السوق حتى تفتح عشان أسعار مغرية أو حاجة كنت بتدور عليها من زمان.

-انك تكتب كل حاجة وتسيب الكتابة تشرح نفسها بنفسها: مش كل الناس بتحب تتفاعل بالكلام ولا بالسؤال فسيب أي سؤال متكرر واجابته في مكان واضح. احنا حددنا الأساسيات الاجبارية وهي:- (1) كارت وصف لكل مواصفات وموديل وطبيعة حالة واستعمال البضاعة و(2) السعر المطلوب واللي هو دايما تفتيح كلام أو لو انت عايز يبقى فصل الخطاب و(3) صور من المنتج ونمرة تليفونك لو حاجة معروضة تحت الروف (عربية أو موتوسيكل) عشان تعرف تنزل تعاينها (ممنوع الركنة أمام أي عمارة من فضلكوا. الركنة فقط أمام أرصفة بدون عمارات مثل الشارع العمومي أو الجنينة القريبة).

-خللي معاك قلم لتعديل السعر لو حبيت تعمل كده أو لو حبيت تعمل اضافة في كارت الوصف زي سؤال بيتكرر كتير.

-متنساش يبقا معاك فكة طبعا. عشرات وخمسينات ويمكن ميات.

-بعد ما تخلص ارجع البيت ولو لقيت أي حاجة تستاهل البيع في السوق الشهري الجاي ، حطها في صندوق (على جنب) عشان ماتقعدش تدور عليها كل مرة وزود عليها من حاجات أصحابك لو عندهم.

-لو حاجاتاك كتيرة وصغيرين وشكلهم ييجو في بيعة واحدة ممكن تبيعهم مع بعض بسعر واحد. دي فيها ميزة كبيرة للبائع انك تخلص حاجتك بسرعة من غير مهاتية كتير. ده طبعا لازم يكونوا بشكل ما يضايقش المشتري زي ان اللي ميلزمهزش تقيل أو غبي في شيلته فمممن يرفض البيعة كلها عشان الحتة دي أو انه فعلا فعلا مش محتاجهم لدرجة انه حيرميهم بعد الشرا ومستحرم يشتري اصلا عشان كده حتى لو السعر مغري.

-اعمل حساب الناس حتروح بحاجتها اللي اشرتيتها منك ازاي؟ يعني لو كتب كان ممكن يبقا معاك أكياس يشيل فيها الكتب. ولو حاجة تقيلة جدا يبقا فيه سعر في البيعة لنقل الحاجة مطرح ما يحب ومن غير مفاصلة جديدة (ان أمكن طبعا).

-لو عندك حاجة سلبية تعرفها عن البضاعة قولها وخليك صريح. انت جزء من مجتمع مش بياع غريب عنهم ولو غريب وعايز تبقا منهم لازم ميرجعوش بكلام وحش عنك. الحاجات دي لما تكتبها في كارت الوصف في التسجيل عالفورمم بتبقا وضحتها وأثبت صراحتك للجميع. المعاملة كمان تفرق. يعني لو وقفت تتريق على أسئلة الناس ("أمال حيبقا ايه يعني؟" مثلا) مش حتجذب حد ليك والناس تعرف كلها بعض ومش حتكسب كتير مالوقفة دي.

-لو الحاجات اللي حتبيعها عندك منها كميات أو حاجات من مزرعة أورجانيك أو عندك ورشة متخصصة في حاجات تعجب مجتمع السفاري وتحب تشهرها وسط الناس وهكذا .... كلمنا بعد ما تدخل حاجتك عالفورم بتاعة الايفنت عادي (ابعتلنا واتساب على نمرة 01111254411 ) وممكن نعملك حاجة وسط بقية الناس بشكل مشرف وطبعا حنطلب تخفيض خاص جدا جدا جدا في يومها وتخفيض تاني مميز جدا برضه لأعضاء النادي اللي عندهم رقم العضوية الدائم SSC-ID الخاص بيهم (على واحد من اللوجبوكات الرسمية للنادي)

نصائح عامة:-
1- طبعا من غير كلام لازم تكون مليت الفورم قبل ما يقفل المعاد النهائي عليك (حتلاقيها في الايفنت). وطبعا مش حينفع تملاها غير لما تكون عملت SSC-ID لو مكنتش عملتها وطلعلك رقم.

2- لازم تقف جنب حاجتك طول فترة السوق (هما كام ساعة نهار وخلاص) عشان متضعش منك حاجة. دي خارج سيطرة المنظمين زي ما انت عارف. لو رايح الحمام ممكن تسيب حد من زمايلك أو حد موثوق فيه يقف عالحاجة لغاية ما ترجع.

3- أهم حاجة تعملها مع النظمين هو انك ترجعلهم بأفكار للتحسين (في اللي انت شايفه مشكلة او احتمال يتحول لمشكلة) أو مزايا في السوق لاحظتها عشان يحافظوا عليها ويكبروا فيها.

4-لازم تعد فلوسك كويس قوي اللي بتستلمه واللي بترجعه باقي. الغلطة في ده صعب تصليحها بعدين مع الأسف.

5-لو حاجتك كتير اكتبها في لستة واطتب جنبها السعر اللي بعت بيه في الآخر عشان تعرف تعد فلوسك وانت راجع آخر النهار وانت متأكد ان مفيش حاجة ضاعت.

-ما تسبش نمرة تليفونك لو عايز ما يجيلكش تليفونات كتير. ونبه أصحابك ما يطلعوش نمرتك لو حد طلبها منهم عشان النمرة أول ما بتخرج بتفضل في ايدين الناس فترة لشهور وحتى لو بعت الحاجة.

-البس كويس طبعا. دي حاجة مفروغ منها. بس لو لبست بدلة وكرافتة البس كمان طربوش وهات منشة وشمسية عشان كده حيبقا لبس تنكري! :) بس طبعا المظهر الكويس وحسن التعامل "المناسب" بيريح الناس ويخليهم يستريحولك ويقللوا المفاصلة ويخلصو البيعة.

لتقليل تكلفة البيع فيه حاجات ممكن تعملها طبعا بس في حدود:-
1- ان لو حاجاتك قليلة جدا أو رخيصة جدا ... انك تضمها مع بضاعة حد تاني في الحجز على الفورم بتاعة السوق (ما ينفعش تضمهم بعد ما حجزت فبرجاء الحرص قبل الحجز لمراجعة زملائك.